Bulliqi thotë se opozita është duke bllokuar zgjedhjen e kryesuesit të kuvendit
Kryetari i Komunës së Podujevës, Shpejtim Bulliqi, ka thënë se partitë opozitare janë duke bllokuar zgjedhjen e kryesuesit të kuvendit komunal.
Kjo deklaratë e tij erdhi pasi në rend të ditës ishte zgjedhja e kryesuesit të kuvendit komunal dhe Komitetit për Politikë dhe Financa (KPF).
Për kryesues të kuvendit u propozua vetëm një kandidate, Adelinë Stublla, nga Grupi i këshilltarëve të Lëvizjes Vetëvendosje!. Ndërsa, partitë tjera të përfaqësuara në kuvend nuk patën propozime.
Në seancën e Kuvendit Komunal, Bulliqi ka kërkuar shtyrjen e seancës, në mënyrë që të marrin kohë për diskutim dhe për gjetjen e një rrugëzgjidhje për zgjedhjen e trupave të kuvendit.
Në këtë seancë u betuan dy anëtarët e rinj të kuvendit, Fahri Hasani nga LDK-ja dhe Mimoza Abdullahu-Stublla, të cilët zëvendësuan Ekrem Hysenin dhe Floretë Zejnullahun.