Burri që lozte me engjëj
XHEVDET BAJRAJ
1.
Derisa po zbriste shkallëve
si fëmijë që përpiqej ta shqiptonte fjalën nënë
u rrëzua
e humbi mundësinë e të folurit
ende pa folur
2.
Kur e pa diellin për herë të parë
e përcolli gojëhapur derisa perëndoi
një zog e ngatërroi me lulediell
i zbriti mbi sup
ia hëngër të gjitha fjalët
Shurdhmemecit i mbetën
vetëm klithmat
apo diçka ngjashëm me klithmat
3.
Ai e dinte se cili ishte
se toka
se qielli se njerëzit
se ndonjë re e humbur në qiell
se çdo gjë që e rrethonte
tërë kohën
ia shpjegonin me duar
4.
Ishte burrë dheu
(tingëllon kjo kaq bukur
në gjuhën e shqiponjave)
aq i fascinuar nga jeta
saqë kurrë
nuk mundi ta shprehë me fjalë
5.
Ai i fliste të gjitha gjuhët e botës
por askush nuk e kuptonte
nëse nuk kishte
së paku
dritë të hënës
6.
Sa ishte fëmijë
ditën nuk kishte me kënd të luante
por natën
kur e zinte gjumi
lozte me engjëj
Se vetëm me ta kuptohej
kështu që
shkonte në shtrat herët
7.
Në pranverë
i pëlqente ta lëvronte tokën
derisa ishte e ftohtë
Edhe qielli ishte i ftohtë
veç buka në shtëpi
e priste e ngrohtë
dhe buzëqeshja e nënës së tij
8.
Ishte i adhuruari i nënës së tij
pas punës ditore
në mbrëmje e mbështeste kokën
në prehrin e saj
ajo ia ledhatonte flokët
dhe i fliste
i fliste shumë
ashtu si i flet nëna të birit në djep
Ai nuk e dëgjonte
por e ndiente veten mirë
oh sa mirë
Kur i vdiq nëna
ai e varrosi në zemër
dhe për herë të parë
e dëgjoi zërin e saj
9.
I pëlqenin jashtëzakonisht
filmat pa zë
edhe pse të gjithë filmat
për të ishin pa zë
ai ata i shijonte
shumë më tepër se të tjerët
Por derisa ai po mplakej
dhe kishte më shumë kohë
ta shikonte televizionin
filmat pa zë nuk shfaqeshin më
u zhdukën
10.
Derisa ishte i ri
u kthye nga ara në shtëpi
dhe i pa anëtarët e familjes
të tmerruar
Ia shpjeguan se një gjarpër
ndodhej në oborr
dhe se kishin frikë të dilnin
jashtë shtëpisë
U përpoq të thotë diçka
por dikur e humbi durimin
e mori gjarprin me kujdes
dhe me po të njëjtin kujdes
e lëshoi në rrugë
Pas dy muajve
e braktisën shtëpinë e vjetër
(pa e ndërtuar shtëpinë e re)
ky sërish deshi të thotë diçka
në lidhje me gjarprin
por heshti
11.
Ishte fëmijë
që përnatë
ia prishte gjumin
një shtazë e re
e rënë në kurth
që po vdiste nga etja
tashmë disa ditë
Burri
që e kishte ngre kurthin
kishte një javë
që nuk e kishte vizituar
12.
I pinte nja dy a tri birra
në shitoren e fshatit
Kur qeshnin burrat aty
me birra në dorë
qeshte edhe ai
(zemra i bëhej mal
kur e shihte dikë duke qeshur)
Pasi bënte një hap në qiell hëna
kthehej në shtëpi
E kalonte natën nëpër vrimë gjilpëre
apo nata përbirohej nëpër të
Gjelat e fshatit këndonin për të gjithë
ama vetëm ky nuk i dëgjonte
Kjo nuk i pengonte
të shkonte i pari në arë
13.
Ti e përshëndesje
por ai nuk ta kthente përgjigjen
sepse ishte shurdhmemec
por nëse të shihte
ai për një mirëmëngjesi apo mirëdita
ta jepte zemrën
14.
Fadilin pesë a gjashtë vjeç
e pat zënë rrota e qerres së qeve
e mbushur deri në majë me gurë
Ky që nuk fliste me gojë
as dëgjonte me vesh
me dy duart e tij e ngriti qerren
oborrin
fushat me gjithë lisa
bjeshkët
saqë qielli u tërhoq
Unë isha katër vjeç
dhe vdiqa për herë të dytë
Fadilin
vëllanë
e shpëtoi lëkura e qengjit të zi
15.
Shurdhmemeci e kishte një trup prej atleti
më sillte fryte nga ato të shkurreve të malit
ha këto më thoshte me lëvizje të duarve
dhe bënte me gisht të drejtuar kah qielli
I haja pa e ditur nëse e kishte fjalën për Zotin
për muzën apo për poezinë
Tani
hipur mbi shpinë të ujkut
gjysmë ilir gjysmë actek
para se të arrij në cak
po e kuptoj
pak si vonë
ai më thoshte
bëhu i fortë dhe jetoje jetën
16.
Sa herë takonte njeri a fëmijë
që e përshëndetnin
me dorë në ajër
ai ua kthente me një buzëqeshje
dhe me dorën e vendosur mbi zemër
Mua për përqafonte sa herë më shihte
se unë isha gjak i tij
e ai mund ta dëgjonte
gurgullimën e gjakut
17.
Pinim birra
në shitoren e kushëririt
hanim mish nga konserva
shikoheshim
ngrinim dolli
por nuk kuptoheshim qind për qind
ai ishte i shurdhër
e unë memec
apo e kundërta
s’ka rëndësi se kënaqeshim
Normal
nuk e pata parë vdekjen
në sytë e tij
18.
Sa herë e takoja
pas katër pesë fjalive
që mund t’i ndërronim mes vete
si je
fëmijët si janë e ngjashëm
ma dridhte një cigare
për vete po ashtu
dhe e pinim në heshtje
të qetë
me respekt ndaj njëri-tjetrit
Ndërkohë u vinte radha
cigareve të mia me filter
Pastaj ai shkonte
ta mbështeste kokën
në jastëkun e vet
e unë kthehesha në shtëpi
ta shikoja ndonjë film
apo ta shkruaja ndonjë poezi
pa lidhje
ashtu si e kërkonte koha
19.
Njeriun e parë
që e kishte përshëndetur
pa e njohur
ka qenë një i ri
me të meta mendore
Ndërsa po ngjitej
rrugës përpjetë
kah shtëpia e myshteriut
që i kishte porositur
një kalë dru
I riu qëndronte në mes të rrugës
me pantallona e brekë
të rëna
deri te zogjtë e këmbëve
dhe nuk e kishte ndërmend
të lëvizte nga vendi
derisa dielli po lindte
mes këmbëve të tij
e ai duke qëndruar në këmbë
dhjehej
I pagoji e hapi gojën
ia bëri me dorë
dhe theu rrugën
20.
Kur më ka lindur djali im i parë
me paratë e druve të shitura
ia solli për dhuratë
një kalë prej druri
Hëngri drekë
e mori kalin e tij
dhe u nis për në fshat
Kurrë nuk i hipte kalit në qytet
apo në fshat
Në të vërtetë
nuk e di nëse i ka hipur ndonjëherë