Një marrëveshje për njohje të ndërsjellët në mes të Kosovës dhe Serbisë do të sillte normalizim të marrëdhënieve mes dy vendeve por edhe garanci të fortë për stabilitetin e rajonit.

Kështu ka thënë ministri për Evropën dhe Punët e Jashtme të Shqipërisë, Ditmir Bushati, në një takim me përfaqësues të Luginës së Preshevës.

Në kulmin e debatit rreth korrigjimit të kufijve, ministri Bushati ka ndarë me bashkëbiseduesit qasjen e Shqipërisë në raport me këto zhvillime, duke e vënë theksin tek rëndësia e vijimësisë së dialogut dhe orientimin e tij në mënyrë efektive, në terma të qartë, pa ekuivok dhe të balancuar për sa i përket zbatimit të plotë të marrëveshjeve dhe avancimin e proceseve integruese të Kosovës.

“Ne i qëndrojmë bindjes tonë se procesi i dialogut duhet të përmbyllet me një Marrëveshje për njohje të ndërsjellë mes dy vendeve, që do të sillte jo vetëm normalizimin e plotë të marrëdhënieve mes tyre, por edhe do të ishte një garanci e fortë për stabilitetin demokratik të të gjithë rajonit”, ka thënë Bushati. (TCh).