Dy futbollistët e Përfaqësueses së Kosovës në futboll, Zymer Bytyqi dhe Lumbardh Dellova janë përfshirë në ekipin ideal të javës në Bullgari. Dyshja “dardane” shkëlqyen në fitoren e CSKA Sofjes në fundjavën që shkoi.

Gjiganti bullgar triumfoi në udhëtim te Heber Pazardzhik me rezultat 1-0, ndërsa dyshja kosovare ishte më e vlerësuara në fushën e blertë. Bytyqi e mori notën më të lartë, 7,9, ndërsa me paraqitje solide u shqua edhe ish-futbollisti i Ballkanit, Dellova, i cili e mori notën 7,7. Dhe, këto paraqitje të tyre u vlerësuan nga faqja e specializuar për vlerësimin e lojtarëve “Sofascore”. Ata u përfshinë në formacionin e xhiros së 17-të të ligës elitare në Bullgari.