Ministri i Arsimit, Shkencës dhe Teknologjisë, Shyqyri Bytyqi ka thënë se sistemi i mësimit shqip në diasporë është pjesë e sistemit të arsimit në atdhe dhe misioni i mësuesit është i shenjtë. 

Ai më tej ka deklaruar se diaspora dhe mërgata shqiptare ka qenë shpresa e madhe për Kosovën në ditë të vështira dhe ka dhënë kontribut të çmuar. Sipas tij, tani është koha që institucionet tona të mbështesin shkollën shqipe në diasporë.

“Në pritjen që organizova për mësimdhënësit e mësimit plotësues në gjuhën shqipe në diasporë, iu ndava atyre mirënjohje për punën e suksesshme me nxënësit shqiptarë në mësimin e gjuhës shqipe dhe të kulturës shqiptare. U shpreha mirënjohës dhe falënderues ndaj mësimdhënësve shqiptarë kudo që jetojnë, e që japin kontribut të madh që fëmijët shqiptarë të mësojnë gjuhën, kulturën dhe historinë shqiptare. Sistemi i mësimit shqip në diasporë është pjesë e sistemit të arsimit në atdhe dhe misioni i mësuesit është i shenjtë. Prandaj, iu thashë mësuesve se ata janë patriotë, që me përkushtim e vullnet po kontribuojnë në mësimin e gjuhës shqipe, ruajtjen e traditës dhe kulturës sonë kombëtare tek të rinjtë tanë në diasporë”, ka shkruar Bytyqi në profilin e vet në “Facebook”.

“Theksova faktin se diaspora dhe mërgata shqiptare ka qenë shpresa e madhe për Kosovën në ditë të vështira dhe ka dhënë kontribut të çmuar dhe tani është koha që institucionet tona të mbështesin shkollën shqipe në diasporë. Si institucione kemi obligim t’iu krijojmë mundësi dhe kushte që në diasporë të zhvillohet mësimi, në mënyrë që të rinjtë tanë dhe fëmijët tanë ta ruajnë të pastër gjuhën shqipe, kulturën dhe historinë tonë. Jam i sigurt se me një organizim të institucioneve të vendit (Kosovës dhe Shqipërisë), dhe të mësuesve në diasporë mund të arrihet ruajtja e gjuhës dhe kulturës shqiptare kudo që jetojnë shqiptarët”, ka deklaruar Bytyqi, duke shtuar se MAShT po mundohet që të artikulojë çdo kërkesë të diasporës shqiptare, për të ndihmuar kështu zhvillimin e mësimit shqip, por pas teksteve shkollore dhe kurrikulave për mësimin shqip në diasporë, shpresoj që marrëveshjet e nënshkruara mes qeverive të Kosovës dhe Shqipërisë për financimin e mësimit shqip në diasporë, të fillojnë të implementohen sa më shpejt.

“Me këtë rast, kërkova bashkëpunim më të madh mes institucioneve dhe mësimdhënësve në diasporë, në mënyrë që të rritet pjesëmarrja e fëmijëve në mësimin plotësues në gjuhën shqipe, ndërsa u zotova se, duke bashkëvepruar me Ministrinë e Arsimit në Tiranë, do të jemi gjithmonë pranë tyre dhe t’iu ndihmojmë në organizimin e mësimit të gjuhës shqipe për fëmijët tanë në diasporë”, është shprehur ai.