Dëshmitari Halil Çadraku, ka thënë të martën në Hagë se gjatë gjithë veprimtarisë së tij në sektorin e Zbulim-Kundërzbulimit (ZKZ), asnjëherë nuk ka marrë ndonjë urdhër nga Kadri Veseli.

Ai ka thënë se kjo nuk kishte ndodhur as ndaj anëtarëve të tjerë të shtabit të përgjithshëm, për çfarë ka theksuar se nëse do të ndodhte, do të ndihej krenar.

“Kurrë gjatë krejt veprimtarisë time nga 8 janari e deri në atë kohë kur e kam lënë këtë detyrë më 20 prill të vitit 2000, unë kurrë nuk kam pas ndonjë urdhër nga Kadri Veseli apo ndonjë urdhër nga sektori përkatës i shtabit të përgjithshëm. Në dokumentet e mia do të isha shumë krenar po të kisha ndonjë urdhër apo detyrë nga ata, por kurrë nuk kam pas një diçka të tillë. Gjithmonë kam vepruar me ato opinionet e mia me çka kam kuptuar dhe cila rrugë është më e mira”, ka thënë Çadraku.

Përpara kësaj, Çadraku ka thënë se nga nëntori i 1998-s deri në mars të ’99-s nuk e kishte parë asnjëherë Kadri Veselin.

“Nga 16 nëntori e deri në mars, unë nuk më kujtohet dhe nuk e kam parë Kadri Veselin”, ka thënë Çadraku, duke shtuar se nuk ka pasur asnjë kontakt me të.

“Gjithmonë jam munduar që ta propozoj, ta informoj komandantin tim, e përmes komandantit ata në Shtabin e Përgjithshëm se çfarë po ndodhë në Zonën Operative të Pashtrikut. Të gjithë kanë qenë me vetë iniciativë, të gjitha kanë qenë opinioni im, të gjitha kanë qenë mendimi im se si duhet të veprohet, punohet në situata të caktuara për mbrojtje”, ka thënë Çadraku.

Ai ka theksuar se vija e raportimit të tij ka shkuar përmes strukturës së Zonës, konkretisht komandantit dhe kurrë rrugë direkte nuk ka marrë për raportim tek shtabi i përgjithshëm të UÇK-së.

“E di që kurrë nuk kam raportuar direkt në shtabin e përgjithshëm për këto gjëra”, ka thënë Çadraku.