Cakaj takohet me Jasharin dhe Lladrovcin: Biseduam për pastërtinë e luftës së UÇK-së
Ministri në detyrë për Evropë dhe Punë të Jashtme, Gent Cakaj, ka pritur në takim, kryetarin e Skenderajt, Bekim Jashari dhe atë të Drenasit, Ramiz Lladrovci, me të cilët ka bisduar për drejtësinë dhe pastërtinë e luftës së UÇK-së.
“Sakrifica sublime e familjes Jashari e Lladrovci ndër breza për lirinë e Kosovës duhet të shërbejë si burim frymëzimi për gjithë shqiptarët kudo ndodhen…”, ka shkruar Cakaj në llogarinë e vet në “Facebook”, raporton “Epoka e re”.
Postimi i plotë i Cakajt:
Sot pata nderin e rrallë të pres kryetarin e Skenderajt, Bekim Hamëz Jashari dhe kryetarin e Drenasit, Ramiz Tushë Lladrovci, në një takim të përzemërt në Tiranë.
Biseduam për punën e tyre shumë të vyer në zemër të Drenicës, drejtësinë e pastërtinë e luftës së Ushtrisë Çlirimtare të Kosovës e rëndësinë e patjetërsueshme të bashkëpunimit mes Republikës së Kosovës e Shqipërisë.
Po ashtu, theksuam edhe domosdoshmërinë e ruajtjes së shumicës shqiptare në Bujanoc. Kjo e fundit, është edhe detyrë historike edhe nevojë institucionale për shqiptarët e Luginës së Preshevës.
Sakrifica sublime e familjes Jashari e Lladrovci ndër breza për lirinë e Kosovës duhet të shërbejë si burim frymëzimi për gjithë shqiptarët kudo ndodhen…
(Q.R/ Epoka e re)