Chelsea ka fituar 2-0 ndaj Southempton në “Wembley” dhe do të luajë kundër Manchester United në finalen e “FA Cup”, Kupa e Anglisë, veprimtaria më e vjetër e planetit (u luajt për herë të parë në vitin 1871).

Në një ndeshje të dominuar nga “blutë”, episodi vendimtar ndodhi në minutën e parë të pjesës së dytë, kur Olivier Giroud shënoi një gol shumë të bukur.

Sulmuesi francez, i aktivizuar si titullar nga Conte në vend të Morata, mori një pasim nga Hazard dhe pasi dribloi tre kundërshtarë në një zonë shumë të ngushtë, tundi rrjetën duke firmosur golin e parë për londinezët. Dhjetë minuta para fundit, Conte zëvendësoi Giroud me Morata dhe vetëm dy minuta më vonë, spanjolli realizoi golin e dytë për “blutë”, duke mbyllur llogaritë.

Chelsea, që renditet në vendin e pestë në Premier League, ka mundësinë ta mbyllë sezonin duke fituar një trofe. “Blutë” do të luajnë për herë të 13-të në finalen e Kupës së Anglisë, veprimtari të cilën e kanë fituar shtatë herë, për herë të fundit në vitin 2012.