Nënkryetarja e Partisë Demokratike të Kosovës, Vlora Çitaku, ka akuzuar kryeministrin në detyrë, Albin Kurti, se po e shkel ligjin me pritjen që po ua bën partive politike të komuniteteve në ambientet e qeverisë, për konsultat për formimin e Qeverisë. Sipas saj, Kurti do ta ketë dështim e turp në fund të karrierës politike.

Çitaku përmes një postimi në rrjetin social “Facebook” ka shkruar se Kurti e ka shndërruar zyrën e shtetit në zyrë partie.

“Mbyllni sytë për një çast. Dhe imagjinojeni sikur Hashim Thaçi, Isa Mustafa, Ramush Haradinaj, apo kushdo tjetër përpara Albin Kurtit  të kishte bërë atë që po bën ai sot. Imagjinojeni një Kryeministër që, në vend se të shërbejë popullin, e shndërron zyrën e shtetit në zyrë partie. Që përdor pushtetin e tij për të zhvilluar pazare politike prapa dyerve të mbyllura. Që thërret përfaqësues të komuniteteve jo-shumicë, jo për t’i dëgjuar, por për t’i nënshtruar. Jo për dialog, por për presion. Albin, Kosova nuk është parti. Kosova nuk është pronë”, ka shkruar ajo në Facebook..

Çitaku ka thënë se Kurti do të ketë fund të turpshëm në karrierën politike.

“Ti nuk je mbi ligjin. Nuk je mbi Kushtetutën. Nuk je mbi dinjitetin e këtij populli që ka vuajtur për demokraci, jo për t’u shndërruar në spektatorë të një partie që kërkon të kontrollojë gjithçka. Po i shkel ligjet. Po i përbuz traditat. Po i përdhos parimet që dikur i mbroje me pasion. Albin, me këtë qasje, fundi yt politik nuk do të jetë vetëm një dështim, do të jetë i turpshëm. Historia nuk fal. Populli nuk harron”, ka shkruar ajo.

Ndryshe, Kreu i Lëvizjes Vetëvendosje, Albin Kurti ka nisur dje [ mërkurën] konsultat për formimin e Qeverisë pas zgjedhjeve të 9 shkurtit. Takime pati edhe të enjten. E Instituti Demokratik i Kosovës kritikoi takimet në hapësirat e ekzekutivit. Hulumtuesi Eugen Cakolli ka thënë se veprimet e tilla s’duhet të normalizohen.

“Kjo nuk është çështje teknike, por një praktikë që zbeh kufirin mes shtetit dhe partisë, dhe që tregon shumë për mënyrën si konceptohet pushteti. Një subjekt politik që synon të qeverisë vendin duhet të tregojë standarde më të larta – jo të shfrytëzojë hapësirat e shtetit për interesa të veta. Prandaj, takimet konsultative për formimin e qeverisë duhet të mbahen në seli partie ose në ambiente neutrale, e kurrsesi në zyra publike që u përkasin të gjithë qytetarëve”, ka thënë Cakolli.

Ndërkaq, në Vetëvendosje arsyetuan veprimin e Kurtit.

“Kryeministri Kurti po i mban takimet në zyrën e tij në Kryeministri, në ndërtesën e Qeverisë, sepse aty punon. Edhe mysafirët po ashtu po e preferojnë qeverinë”, tha në një përgjigje për KOHËN, zëdhënësi i Vetëvendosjes, Arlind Manxhuka.