Nënkryetarja e PDK-së dhe ish-ambasadorja e Kosovës në Uashington, Vlora Çitaku, ka thënë se gjithmonë duhet marrë me rezervë çfarëdo deklarimi që vjen nga Beogradi.

Megjithatë, ajo ka potencuar se është shqetësuese heshtja e ministres Donika Gërvalla dhe ministrisë që ajo drejton karshi pretendimeve që hedh në publik Beogradi.

“Nga përvoja, gjithmonë duhet marrë me rezervë deklaratat nga Beogradi. Në raport me Kosovën ata vazhdimisht synojnë të krijojnë mjegull dhe huti. Çka thonë eksponentët në Beograd nuk e trajtoj kurrë si të mirëqenë. E di çka kanë thanë për mua dhjetëra herë. Veç alien nuk më patën bërë”, ka shkruar Çitaku në “Facebook”.

Çitaku ka thënë se e njeh dhe kupton natyrën e punës së ministres Gërvalla, por ka shtruar se një përgjigje Beogradit duhet dhënë.

“Mirëpo ajo që më shqetëson është heshtja e Ministrisë së Punëve të Jashtme. Sigurisht unë e kuptoj natyrën e punës dhe diskrecionin që ndonjëherë ta imponon diplomacia. Po një përgjigje duhet dhënë”, ka shkruar Çitaku.

Ky reagim i Çitakut vjen pas konferencës së djeshme të presidentit të Serbisë, Aleksandër Vuçiq në të cilën pretendonte se një numër shtetesh kanë tërhequr njohjen për pavarësinë e Kosovës.