Sekretarja e përgjithshme e PDK-së, Vlora Çitaku, ka reaguar për shakanë në të cilën ka rënë kryeministri i Kosovës, Albin Kurti.

Duke komentuar bisedën, ajo ka thënë se përmbajtja është skandaloze.

Ajo ka thënë se Kurti ka sulmuar opozitën, mediat dhe bizneset.

E dëgjova bisedën ku kryeministri Kurti kishte rënë në grackën e komedianëve rusë, duke besuar se po fliste me presidentin e Letonisë. Të biesh në grackë nuk është pjesa më e turpshme – për këtë duhej të kujdesej kabineti i tij. Por ajo që është vërtet e turpshme dhe skandaloze është përmbajtja e asaj bisede. Kryeministri e shfrytëzon këtë ‘takim’ për të sulmuar opozitën, mediet, bizneset – madje edhe administratën e re amerikane. E gjithë biseda nxjerr në pah një nivel shqetësues sipërfaqësor dhe të paditur në trajtimin e çështjeve të politikës së jashtme. Dhe nëse kjo është mënyra se si Kurti flet në takime me liderë ndërkombëtarë, atëherë… mozomakeq për ne”, ka shkruar Çitaku në “Facebook”.