Luftimet kanë shpërthyer në rrugët e Kharkivit, qyteti i dytë më i madh në Ukrainë, pasi forcat ruse hynë në qytet.

Ministria ruse e Mbrojtjes, ka thënë më parë se kishte në shënjestër vetëm infrastrukturën ushtarake, duke thënë në një deklaratë: “Forcat e Armatosura të Federatës Ruse nuk godasin qytete dhe qyteza, ato marrin të gjitha masat për të shpëtuar jetën e civilëve”.

Por presidenti i Ukrainës, Volodymyr Zelensky, ka thënë të dielën: “Ata gënjyen kur thanë se nuk do ta synonin popullsinë civile. Që në orët e para të pushtimit, trupat ruse kanë goditur infrastrukturën civile.”

“Ky është terror”, ka thënë ai, ndërsa kryeministri ukrainas, Denys Shmyhal, ka thënë se Rusia po kryen krime lufte.

Ndërkohë, komandanti i forcave ukrainase në Kharkiv, Oleg Synegubov, ka pohuar se dhjetëra trupa ruse janë dorëzuar mes luftimeve të vazhdueshme në qytet, i cili është rreth 20 milje nga kufiri rus.

Betejat janë ndezur gjithashtu në kryeqytetin e Kievit dhe qytetin jugor të Khersonit ditët e fundit.

Por forcat ruse nuk kanë qenë në gjendje të kapin asnjë nga qytetet kryesore të Ukrainës që nga fillimi i pushtimit të tyre të enjten.

Rusia po përballet me rezistencë “më të ashpër se sa pritej” nga ushtria ukrainase, si dhe vështirësi të papritura në furnizimin e forcave të saj, kanë thënë për “CNN”-in dy zyrtarë të lartë amerikanë me njohuri të drejtpërdrejta në situatën e krijuar.

Në fushën e betejës, Rusia po pëson humbje më të rënda në personel, forca të blinduara dhe avionë sesa pritej. Kjo është pjesërisht për shkak të faktit se mbrojtjet ajrore ukrainase kanë përforcuar më mirë sesa kishin parashikuar vlerësimet e inteligjencës amerikane para pushtimit.

Përveç kësaj, Rusia nuk ka vendosur ende epërsi ajrore mbi Ukrainën, ka thënë një zyrtar i lartë i mbrojtjes, ndërsa Forcat Ajrore të Ukrainës dhe sistemet e mbrojtjes ajrore luftojnë për kontrollin e hapësirës ajrore.