Rusia po raporton rritje të rasteve të reja me Covid-19. Autoritetet në këtë shtet kanë raportuar të dielën 14.723 raste të reja me ketë virus, përfshirë 7.704 raste në Moskë.

Shifra është më e larta që nga 13 shkurti.

Grupi punues kundër Covidit ka njoftuar se 357 njerëz kishin vdekur nga shkaqe të lidhura me ketë virus në të gjithë vendin, duke e çuar numrin e përgjithshëm të viktimave në 126.430.

Por, sipas Agjencisë Federale të Statistikave, e cila ka bërë një llogaritje të veçantë, Rusia regjistroi rreth 270.000 vdekje midis prillit 2020 dhe prillit 2021.

Në kryeqytetin rus, Moskë, njerëzit janë udhëzuar që të punojnë nga shtëpitë javën e ardhshme.

Më 12 qershor, kryebashkiaku i Moskës Sergei Sobyanin, ka thënë se të paktën deri më 20 qershor, restorantet, baret dhe vendet e ngjashme në qytet mund të mos u shërbejnë klientëve pas orës 11:00.

Autoritetet kanë njoftuar që personat të cilët nuk mbajnë maska dhe doreza në vendet publike do të gjobiten me 70 dollarë.

Më 12 qershor, agjencia e lajmeve Interfax citoi presidentin rus, Vladimir Putin, të thoshte se 18 milionë rusë deri më tani janë vaksinuar kundër Covid-19.

Rusia ka rreth 144 milionë banorë.