Cristiano Ronaldo është shprehur optimist se Juventus do t’u rikthehet rezultateve pozitive në vitin 2021.

“Bianconerët” i mbyllën ndeshjet e 2020-ës me humbje 0-3 në shtëpi nga Fiorentina në Serie A. Por, ylli portugez beson se skuadra do të rikthehet në rrugën e fitoreve. “Me një paraqitje të zbehtë dhe një rezultat larg nga i pranueshmi, ne i mbyllëm ndeshjet e caktuara për vitin 2020, një vit i veçantë në shumë mënyra. Stadiume bosh, protokole Covid, ndeshje të anuluara, ndërprerje të mëdha dhe kalendar shumë i ngjeshur. Por, kjo nuk është arsyetim për asgjë”, ka thënë Ronaldo. “Ne e dimë se duhet të japim më shumë nga vetja, në mënyrë që të luajmë më mirë dhe të fitojmë më me vazhdimësi. Ne jemi Juventus. Dhe, ne thjeshtë nuk mund të pranojmë asgjë më pak se shkëlqim në fushë”, ka shtuar Ronaldo.

Sulmuesi beson se “Zonja e Vjetër” do të rikthehet edhe me fuqishme në vitin 2021. “Shpresoj që kjo ndërprerje e shkurtër do të na ndihmoj të kthehemi edhe më të fortë dhe të bashkuar se kurrë më parë sepse sezoni është larg nga përfundimi dhe në fund ne besojmë se përsëri do të festojmë me tifozët. Na besoni, besoni tek ekipi siç besojmë ne tek ju, dhe do t’ia dalim. Fino alla fine”, ka deklaruar Ronaldo.