Debatik Curri, ish-futbollisti i Kombëtares së Shqipërisë, ka analizuar zhvillimet e fundit në futbollin shqiptar. Më saktësisht është prekur ndikimi politik mbi zgjedhjet e reja të FShF-së.

Curri është i sigurt se e gjitha kjo do të ndikojë së tepërmi te Kombëtarja dhe tek ekipet shqiptare. Ndërkohë nuk lihen pa përmendur edhe arritjet e bëra në kohët e fundit nga futbolli shqiptar.

“Ne që kemi luajtur për Kombëtaren, e përcjellim me mjaft interes këtë ngjarje që është duke ndodhur në Shqipëri dhe jam mjaft i shqetësuar për gjendjen dhe mënyrën se si po zhvillohet dhe po bëhet presion, siç e kam parë dhe është duke ndërhyrë politika në një garë, që është e ndaluar nga UEFA, që e ka cekur se gjëja kryesore që nuk duhet të bëhet është ndërhyrja e politikës. Çdo garë e ndershme, që bëhet me një kandidat që kandidon dhe dëshiron të bëhet kryetar federate, është e pranueshme, por jo në mënyrat që po zhvillohet tani. Presidenti që është edhe tani, i cili ka bërë një punë të mrekullueshme prej vitesh dhe mendoj se është njeri me edukatë për ta udhëhequr federatën edhe për shumë vite të tjera”, ka thënë Curri.

“FShF-ja është një institucion që është si një lloj shtëpie për çdo futbollist. Sa i përket Armand Dukës, është një ndër personat që ka investuar më shumë në infrastrukturë dhe është duke investuar. Çdo skuadër në Shqipëri ka një stadium. Kjo ndërhyrje do të ndikojë edhe te kombëtarja, edhe te klubet e tjera. Shpresoj që do të ndalen këtu, sepse ka pasur indikacione dhe më herët, për ndërhyrje të politikës. Po shpresoj që kjo të mos ndodhë as në Shqipëri, as në Kosovë e as në ndonjë vend tjetër”, ka shtuar Curri për emisionin “Breaking” në “Top News”, ku foli edhe për drejtimin e Dukës në krye të FShF-së.

“Duka është një njeri që e ka bërë punën mjaft mirë deri tani dhe shpresojmë që të vazhdojë dhe më tej të ketë këtë qasje që ka pasur deri tani. Mendoj që është një person që e meriton të jetë aty dhe ta lejojnë të zhvillojë projektet që i ka për katër vitet e ardhshme. Shpresojmë që këto fjalë tonat t’i kuptojnë njerëzit dhe të kuptojnë njëherë e mirë që njerëzit që punojnë duhet të udhëheqin gjithmonë dhe të vazhdojnë projektet që kanë”, ka deklaruar Curri.