Taulant Dajaku është optimist se skuadra e Ferizajt mund të marrë të paktën një pikë nga përballja me Prishtinën në stadiumin “Fadil Vokrri”

Mesfushori Taulant Dajaku është i lumtur për rezultatet e skuadrës së Ferizajt në ndeshjet e fundit. Ky klub, që është në garën për mbijetesë në tri ndeshjet e fundit, ka marrë gjashtë pikë, pasi ka humbur nga Ballkani dhe ka fituar ndaj Llapit dhe Trepçës ’89.

Dajaku për “Epokën e re” ka thënë se rezultatet e Ferizajt janë shumë të rëndësishme duke pasur parasysh edhe vështirësitë financiare. “Është një moment i mirë në aspektin sportiv për ne si lojtarë pasi më duhet ta pranoj se ka pasur dhe ende ka shumë turbullira në aspektin financiar dhe nga një kaos si ky është vërtet vlerë e madhe e treguar në aspektin sportiv nga ana jonë si lojtarë dhe ky është një tregues se sa karakter dhe sa të fortë jemi bërë në momentin që kemi gjetur balancat e duhura brenda nesh si ekip”, ka thënë Dajaku.

Mesfushori nga Drenica po luan rol kryesor në rezultatet e skuadrës së Ferizajt dhe në këtë klub po vlerësohet edhe si lider. Ai nuk dëshiron që meritat t’i ketë në adresë personale, por në kolektiv. “Nuk më pëlqen të më faturohen meritat për këto suksese, pasi meritor është i gjithë grupi që kemi kontribuar për ta marrë maksimumin. Personalisht po ndihem mirë, se tash po mund ta jap kontributin tim për ekipin pasi që vjet jam penalizuar shumë dhe s’kam pasur hapësira për shkaqe të zgjedhjeve të çuditshme taktike dhe kam vuajtur shumë në atë periudhë”, ka shtuar ai.

Klubi i Ferizajt ndeshjen e radhës e zhvillon të dielën në stadiumin “Fadil Vokrri” ndaj Prishtinës. Në ndeshjen e fundit që është zhvilluar pak javë më parë, Ferizaj është mposhtur me rezultat 3-2. Lidhur me ndeshjen e radhës, Dajaku ka bërë me dije se synohet një rezultat pozitiv.

“Ndeshja e radhës është shumë e vështirë pasi luajmë ndaj një ekipi të fortë dhe që i duhen pikët në luftën për titull, por edhe neve na duhet një rezultat pozitiv që do të ishte një hap dhe më afër gjërave që po pretendojmë dhe shpresojmë ta kemi ditën tonë”, ka thënë Dajaku, i cili mungon në këtë ndeshje për shkak të kartonëve. Aktualisht Ferizaj zë vendin e dhjetë me 25 pikë të grumbulluara, ku nga 21 ndeshjet e zhvilluara ka regjistruar 8 fitore, 1 barazim dhe 13 humbje.

/ Veton ZYMBERI/