Analiza për Covid-19 e kancelares Angela Merkel rezulton negative, kësisoj ajo nuk ka infeksion me virusin.

Lajmin e ka bërë me dije zëdhënësi qeveritar Steffen Seibert i pyetur nga agjencia e lajmeve DPA në Berlin.

Sipas zëdhënësit në ditët e ardhshme do të bëhen edhe disa analiza të tjera.

Kancelarja Angela Merkel vendosi të dielën që vullnetarisht të futej në karantinë në shtëpi, pas konfirmimit të lajmit se është infektuar një mjek, tek i cili kancelarja kishte qenë në kontroll ditën e premte.

Vetëm pak minuta para se të merret vesh ky lajm, kancelarja Merkel dha një konferencë shtypi, ku komunikoi vendimin e qeverisë dhe landeve të Gjermanisë, për ashpërsimin e masave kundër virusit korona në vend. Për infektimin e mjekut të saj ajo është informuar pas përfundimit të konferencës së shtypit.