Në katër komunat veriore të Kosovës, në Mitrovicën e Veriut, Leposaviq, Zveçan dhe Zubin Potok, të dielën janë mbajtur zgjedhjet e jashtëzakonshme për kryetarët e këtyre komunave.

Komisioni Qendror i Zgjedhjeve ka njoftuar se të gjitha vendvotimet janë hapur nga ora 7:00, kurse nga ora 19:00 ka filluar mbyllja e tyre, kur edhe ka nisur numërimi i votave.

Gjatë natës pritet të shpallen edhe rezultatet preliminare.

Kryetarja e Komisionit Qendror të Zgjedhjeve, Valdete Daka, ka thënë se procesi i zgjedhjeve të jashtëzakonshme në komunat veriore kaloi mirë dhe pa ndonjë problem.

“Të drejtën e votës e shfrytëzuan 24.592 qytetarë apo 42.42 për qind e qytetarëve me të drejtë vote”, ka thënë Daka.

Sipas komunave, Daka theksuar se dalja në zgjedhje në Leposaviq ishte 41.57 për qind, në Zubin Potok: 50.74 për qind, në Zveçan: 48.17 për qind dhe në Mitrovicën veriore 38.74 për qind.