Përfaqësueset U21 dhe U19 të Kosovës në hendboll po vazhdojnë përgatitjet për paraqitje në garën e rëndësishme IHF Trophy Intercontinental që prej të mërkurës mbahet në Prishtinë. Dy ditë më parë me përfaqësuesen e juniorëve (U21) është bashkuar pivoti Blendi Dalladaku që luan për grupmoshat e reja të klubit të njohur francez Nantes.

Dalladaku vlerëson lart punën që po bëhet në përfaqësuese, ndërsa është optimist se Kosova do ta fitojë trofeun e IHF-së dhe kështu gjenerata U21 do të kualifikohet në Kampionatin Botëror të Juniorëve që mbahet në verë në Spanjë.

“Dy ditë më parë i jam bashkuar grupit dhe jam shumë i kënaqur me punën e trajnerëve. Jam shumë i kënaqur me grupin e lojtarëve, shumicën prej të cilëve i kam njohur më herët. Edhe me lojtarët që jam njoftuar tani, po shkon shumë mirë. Kemi një grup shumë të mirë të lojtarëve”, ka thënë Blendi Dalladaku. “Synim i gjithë grupit të lojtarëve e trajnerëve është që ta fitojmë garën IHF Trophy Intercontinental dhe kështu të kualifikohemi në Kampionatin Botëror. Mendoj se do t’ia dalim”.

Dalladaku edhe dy vjet më parë ishte në përgatitje me gjeneratën aktuale të juniorëve. Ishte grumbulluar për një kampionat evropian të mbajtur në Bullgari, u paraqit në dy ndeshje miqësore por, për shkak të një lëndimi, nuk udhëtoi me ekipin. Përfaqësuesja U21 po punon nën urdhëratë e trajnerit Fatmir Muhaxheri, që udhëhoqi këtë grupmoshë drejt triumfit në IHF Trophy për Evropë, që në vjeshtë u mbajt në Prishtinë. Kjo grupmoshë mund të shkruajë historinë si e para përfaqësuese e Kosovës në sportet ekipore që siguron paraqitjen në kampionat botëror. Kosova U21 është në Grupin A të garës IHF Trophy Intercontinental së bashku me Nigerinë e Taipein Kinez. Në grupin B janë Australia, Paraguai e ShBA-ja. Të gjitha ndeshjet e fazës grupore luhen në Pallatin e Rinisë dhe Sportit në Prishtinë. Gjysmëfinalet janë të shtunën më 13 prill, kurse ndeshja për vend të tretë dhe finalja të dielën, më 14 prill.

Orari i ndeshjeve:

Të mërkurën takohen:
13:00 SHBA – Australia
15:00 Kosova – Taipei Kinez

Të enjten takohen:

15:00 Australia – Paraguaji
17:00 Taipei Kinez – Nigeria

Të premten takohen:

15:00 Paraguai – SHBA
19:00 Nigeria – Kosova