Vazhdon pa ndërprerje nxjerrja në ankand e disa prej makinave që kanë bërë historinë e Formula 1 dhe garës së famshme 24-orëshe në Le Mans, të gjitha të shitura nga kompania “RM Sotheby”. Pas shifrës rekord të arritur me blerjen e Mercedes të vitit 1954, ditët në vijim koleksionistët do të mund të bëjnë ofertat e tyre për Benetton B191.

Bëhet fjalë për njëvendëshen me të cilën Michael Schumacher konkurroi në sezonin e tij të parë në Formula 1 në skuadrën britanike në 1991. Schumacher arriti rezultate premtuese në Monza, Portugali dhe Spanjë në debutimin e tij në F1, në mes të sezonit, përpara se të fillonte vitin e tij të parë të plotë në F1 një vit më vonë (1992). Asokohe ai garoi me një Benetton-Ford 191, me të cilën u ngjit edhe tri herë në podium.

Pasi u tërhoq nga garat, makina iu shit një pronari privat përpara se të blihej nga Muzeu Indianapolis Motor Speedway në 2005, ku qëndron edhe sot. Sot, shasia B191-08 ofrohet me një ngjyrë shumë të ngjashme me atë të Benetton të vitit 1993, si për sa i përket estetikës së makinës me një vend ashtu edhe për elementë të tjerë si pasqyrat e pasme. Një makinë me kutinë e shpejtësisë dhe motorin ende origjinal, por edhe me certifikatën e origjinalitetit të Benetton që konfirmon përdorimin e makinës nga Schumacher. Ofertat e para do të pranohen nga data 27 shkurt.