Ambasadori amerikan në Kosovë, Greg Delawie, ka thënë se ndjehet i zhgënjyer që Kuvendi i Kosovës nuk ka arritur të përfundojë punën, sa i përket përzgjedhjes së gjyqtarëve vendor për Gjykatën Kushtetuese.

“Mirë se vini dy gjykatësit e rinj të Gjykatës Kushtetuese. I zhgënjyer nga Kuvendi i Kosovës, që nuk arriti t’i përfundojë punimet e tij. Ruajtja e sistemit të drejtësisë në Kosovë dhe rifillimi i procesit ASAP janë shumë të rëndësishme”, ka shkruar ambasadori Greg Delawie në profilin e vet në “Twitter”.

Ndryshe, Kuvendi i Kosovës nuk ka arritur të zgjedhë tre gjykatësit për Gjykatën Kushtetuese.

Në raundin e dytë në garë ishin Remzije Istrefi-Peci, Nexhmi Rexhepi, Safet Hoxha, Shkëmb Manaj, Hajzer Salihu dhe Vigan Qorroli, ku asnjëri nga ta nuk arriti të marrë votat e nevojshme.

Në votimin e parë Kuvendi ka zgjedhur dy gjyqtarë të Gjykatës Kushtetuese.

Radomir Laban nga komuniteti serb është zgjedhur me 71 vota dhe Bajram Latifi nga komunitetet tjera jo shumicë është zgjedhur me 58 vota.