Një delegacion i Bankës Qendrore të Kosovës (BQK), i udhëhequr nga guvernatori i kësaj banke, Fehmi Mehmeti, po merr pjesë në konferencën e organizuar nga Fondi Monetar Ndërkombëtar (FMN) dhe Banka Qendrore e Kroacisë, me titull: “Demografia, punësimi dhe rritja: në drejtim të së ardhmes së Evropës Qendrore, Lindore dhe Juglindore”, e cila është duke u mbajtur në Dubrovnik të Kroacisë.

Pjesë e këtij delegacioni është edhe ministri i Financave, Bedri Hamza.

Gjatë kësaj Konference, delegacioni i BQK-së, i udhëhequr nga guvernatori Mehmeti, ka zhvilluar takim me zëvendësdrejtorin e Fondit Monetar Ndërkombëtar, Tao Zhang, të cilin e ka informuar mbi zhvillimet e përgjithshme në sistemin financiar, si dhe e falënderoi për përkrahjen e vazhdueshme që FMN-ja i ka ofruar BQK-së ndër vite.

Në këtë takim, guvernatori Mehmeti ka shfrytëzuar rastin për të falënderuar Zhangun për aprovimin e misionit të Shqyrtimit të Stabilitetit të Sistemit Financiar (Financial System Stability Review-FSSR), i cili shqyrtim ka qenë jashtëzakonisht i dobishëm për BQK-në për diagnostifikimin e gjendjes së sistemit financiar të Republikës së Kosovës.

Ndërsa, gjatë konferencës, guvernatori Mehmeti ka prezantuar pikëpamjet e Kosovës lidhur me faktorët demografik dhe ndikimi i tyre në tregun e punës, si në Kosovë ashtu edhe në vendet e Ballkanit Perëndimor.

Me këtë rast, guvernatori Mehmeti ka tërhequr vëmendjen të nevoja e orientimit të fokusit jo vetëm në aspektet pozitive, por në nevojën për hulumtime më të detajuara për të kuptuar drejtë edhe efektet negative të emigracionit për vendet tona.

Po ashtu, Mehmeti ka theksuar nevojën e adresimit të kësaj çështje me një qasje shumëdimensionale për Ballkanin Perëndimor, në veçanti përmirësimin e cilësisë së qeverisjes, fuqizimin e institucioneve dhe politikave ekonomike për të krijuar një ambient që inkurajon jo vetëm qëndrimin, por edhe kthimin e diasporës në vendet tona, përfshirë kapitalin për investimin në vendet e origjinës.

/Epoka e re/