Sulmet me raketa që goditën kryeqytetin ukrainas, Kiev, mëngjesin e së premtes, kanë dëmtuar edhe ndërtesat ku ndodhen ambasadat e Shqipërisë dhe Maqedonisë së Veriut.

“Si pasojë e këtyre sulmeve, u dëmtuan pjesërisht fasada e jashtme dhe disa hapësira brenda godinës së ambasadës së Republikës së Shqipërisë në Kiev dhe ambasadave të pesë vendeve të tjera, duke vënë në rrezik jetën e personelit diplomatik. Raportohet vetëm për dëme materiale”, është thënë në një njoftim të Ministrisë për Evropën dhe Punët e Jashtme të Shqipërisë.

Duke dënuar sulmin, ministria ka thënë se sulmi është akt i pakuptimtë ndaj themeleve të vetë diplomacisë ndërkombëtare.

Ministria e Punëve të Jashtme dhe Tregtisë së Jashtme e Maqedonisë së Veriut, ka thënë se personeli diplomatik i pranishëm në ambasadë, nuk është lënduar. Në reagimin e saj, ministria ka dënuar ashpër sulmet me raketa të kryera nga ushtria ruse. “Shërbimet kompetente kanë kryer kontrollin fillestar të dëmtimeve në vend dhe tashmë po punohet për riparimin e tyre”, ka njoftuar të premten nga ministria.

Sipas raportimeve, mësohet se në shënjestër ka qenë një ndërtesë pranë ambasadës maqedonase, e përdorur nga shërbimet e sigurisë ushtarake të Ukrainës.

Ndërkohë, autoritetet lokale në Ukrainë kanë njoftuar se të paktën dy persona kanë humbur jetën dhe disa të tjerë janë plagosur gjatë valës intensive nga bombardimet ruse që goditën Kievin bashkë me rajonin jugor të Hersonit.

Në të gjithë Ukrainën janë lëshuar sirena për të paralajmëruar sulme ajrore për disa orë.Sipas kreut të administratës ushtarake të Kievit, Serhiy Popko, Rusia ka hedhur tetë raketa, përfshirë raketa hipersonike Kinzhal dhe raketa balistike Iskander/KN-23, vetëm në Kiev.

Bombardimet e së premtes në Ukrainë pasuan deklaratën e presidentit rus, Vladimir Putin, i cili të enjten propozoi “një duel të armëve të shekullit 21”, mes Shteteve të Bashkuara dhe Rusisë, për të treguar fuqinë e raketës së re hipersonike balistike të Rusisë, të quajtur Oreshnik, për të cilën tha se nuk mund të shkatërrohet nga mbrojtjet ajrore të Perëndimit. Zyrtarët perëndimorë i kanë hedhur poshtë këto pretendime. Lufta në Ukrainë ka nisur më 24 shkurt të vitit 2022.

Presidenti rus, Vladimir Putin, e ka quajtur luftën “operacion special ushtarak” për të çmilitarizuar Ukrainën.

Perëndimi është përgjigjur ndaj Rusisë, duke goditur ekonominë e këtij shteti me sanksione të ashpra. Si pasojë e luftës kanë vdekur mijëra persona dhe miliona të tjerë janë zhvendosur nga shtëpitë e tyre. /REL