Futbollisti i Feronikelit, Kastriot Rexha, është dënuar me dy ndeshje moslojë nga Komisioni Disiplinor i Federatës së Futbollit të Kosovës.

Ky dënim për sulmuesin erdhi për shkak të incidentit që ai kishte me futbollistin Behar Maliqi në ndeshjen e mesjavës Llapi – Feronikeli. Ndërsa trajneri i Ferizajt, Afrim Tovërlani, është dënuar me 15 euro, pasi bëri shkelje të kodit të etikës sportive.

Komisioni i FFK-së dënoi edhe tri klube elitare: Gjilanin, Dritën dhe Prishtinën me nga 1 000 euro. Gjilani dhe Drita u dënuan me arsyen e hedhjes së gjësendeve në terren, kurse Prishtina u dënua për faktin se tifozët e ofenduan trajnerin Mirel Josa.

/Epoka e re/