Deputeti i Partisë Demokratike të Kosovës (PDK), Mergim Lushtaku, ai i Lidhjes Demokratike të Kosovës (LDK), Besian Mustafa, deputeti Vetëvendosje, Agon Batusha,  deputetja e Aleancës për Ardhmërinë e Kosovës (AAK), Albana Bytyqi dhe deputeti Fridon Lala janë duke marrë pjesë në sesionin treditor të organizuar nga Komisioni Evropian, me qëllim të diskutimit të sfidave të rajonit drejt integrimit evropian, të rinjve në politikë dhe krijimin e hapësirave për dialog.

Lushtaku në “Facebook”, ka shkruar se në këtë sesion kanë takuar raportuesen për Kosovën në Parlamentin Evropian, Viola Von Cramon, ku të njëjtën e ka falënderuar për mbështetjen e vazhdueshme për anëtarësimin e Kosovës në mekanizma evropian.

“Ndër shumë takime e diskutime këtu në Bruksel, sot patëm nderin ta takojmë edhe raportuesen për Republikën e Kosovës në Parlamentin Evropian, Viola Von Cramon, të cilës i shprehëm mirënjohje për mbështetjen e vazhdueshme për anëtarësimin e Republikës së Kosovës në mekanizmat evropian”, ka shkruar Lushtaku.