Kuvendi i Shqipërisë ka mbajtur të enjten një seancë, mes tensionesh të ngritura e përplasjesh fizike të deputetëve të grupimit “Rithemelimi”, pjesë e opozitës në Shqipëri, me pjesëtarët e Gardës së Republikës, që në hyrje të Kuvendit.

Shkak për përplasje fizike u bë tentimi i 13 deputetëve të përjashtuar të këtij grupimi për të hyrë me forcë, duke deklaruar se nuk e njohin vendimin e Komisionit të Etikës të Kuvendit të Shqipërisë.

Komisioni i ka përjashtuar 13 deputetë – Gazment Bardhin, Sali Berishën, Flamur Nokën, Edi Palokën, Albana Vokshin, Elda Hotin, Ervin Salianjin, Bledion Nallbatin, Asllan Dogjanin, Lefter Gështenjën, Isuf Çelajn, Luan Baçin dhe Xhelal Mziun – për shkak të kaosit që kanë krijuar në seancat e mëparshme.

Ata kanë ndezur flakadanë dhe janë përplasur apo kanë qëlluar me mjete të ndryshme drejt punonjësve të Gardës dhe ministrave të kabinetit qeveritar.

Garda nuk i ka lejuar të futen në seancë dhe kjo shkaktoi përplasje, me ç’rast janë thyer edhe xhamat e derës kryesore të Kuvendit.

Deputetët e përjashtuar janë përpjekur të hynin përmes derës dytësore, por nuk kanë arritur, ndërsa nuk kanë munguar debatet me deputetë të shumicës, që kërkonin të hynin për të marrë pjesë në seancë.

Ndërsa deputetë të tjerë të opozitës, ndaj të cilëve nuk kishte masë ndëshkuese u janë nënshtruar një kontrolli të rreptë nga punonjësit e Gardës, për të mos lejuar futjen e gjësendeve të paligjshme, si flakadanë, sprej apo mjete tjera piroteknike siç ka ndodhur në seancat e kaluara.

Megjithatë, disa prej tyre ia kanë dolë të fusin në sallë flakadanë që i ndezën sapo nisi seanca.

Punimet për seancën e Kuvendit nisën mes zhurmës së një pjese të deputetëve të opozitës, që godisnin tavolinat, duke bërë thirrje për anulim të seancës.

Kryetarja e Kuvendit, Lindita Nikolla, ka njoftuar tërheqjen nga rendi i ditës të marrëveshjes për migracionin që ishte nënshkruar mes Shqipërisë dhe Italisë, pas vendimit të Gjykatës Kushtetuese për pezullimin e saj, deri në vendimin përfundimtar.

I pyetur për vendimin e Gjykatës Kushtetueses për pezullimin e ratifikimit të marrëveshjes me Italinë, kreu i grupit të Partisë Socialiste, Bledi Çuçi, ka thënë se vendimi është respektuar duke e hequr nga rendi i ditës, por ka thënë se nuk do të ketë tërheqje.

“Absolutisht jo (nuk tërhiqemi)! Ne do të vazhdojmë t’i qëndrojmë. Unë besoj se kjo është një marrëveshje shumë e rëndësishme për të treguar që jemi vend evropian”, ka thënë Çuçi, raporton “Rel”.

Brenda Kuvendit, pjesëtarë të Gardës ishin pozicionuar jo vetëm para ulëseve të ministrave, siç ndodh kur ka situata të tensionuara, por edhe në pjesët ndarëse mes deputetëve të shumicës dhe atyre të pakicës.

Nën tymin e mjeteve të ndezura piroteknike dhe zhurmës së krijuar qëllimshëm nga deputetë të pakicës, kryetarja e Kuvendit ka hedhur në votim ndryshimet e propozuara nga deputetë të Partisë Socialiste për Rregulloren e Kuvendit.

Me këto ndryshime parashihet ashpërsimi i masave ndëshkuese ndaj deputetëve që shkaktojnë situata të tilla. Maksimumi i ndëshkimit, nuk do të jetë më përjashtim për 10 ditë, por deri në 60 ditë.

Pas seancës, që ka zgjatur vetëm 8 minuta, deputeti Gazmend Bardhi, ka thënë se Rregullorja e re e Kuvendit do të dërgohet në Gjykatën Kushtetuese.

Ndërsa kryetari i grupit të deputetëve të Partisë Socialiste, Bledi Çuçi, ka thënë se ndryshimet në Rregullore janë krejt normale.

Çuçi ka marrë shembullin e Italisë, duke theksuar se në situata të tilla, deputetët atje përjashtohen me 15 seanca plenare.