Deputeti i PDK-së, Artan Behrami, ka akuzuar kryetarin e Vetëvendosjes, Albin Kurtin, se nuk po i interesojnë shqetësimet e qytetarëve, por kapja e institucioneve.

Në një intervistë për “RTV21”, deputeti Behrami, ka thënë se politikat e Kurtit për 20 vjet radhazi i kanë bërë dëm Kosovës.

“Deputetit Albin Kurti nuk i intereson interesi shtetëror i Kosovës. Nuk i intereson rritja e çmimeve të rrymës, rritja e shportës. Nuk i interesojnë marrëdhëniet me ShBA-në të lënduara. Nuk i intereson heqja e sanksioneve nga BE-ja. Nuk i intereson siguria në shkollat e Kosovës, shëndetësia, atij i intereson vetëm një gjë se si ta bëjë Albulena Haxhiun kryeparlamentare. Kjo tregon se sa i pandërgjegjshëm është ky njeri, por ashtu tregon se sa është duke udhëhequr nga politikat kamikaze të cilat që 20 vjet, Kosovës i kanë bërë dëm edhe vazhdojnë t’i bëjnë dëm edhe më tutje”, ka thënë ai.

Deputeti Behrami po ashtu ka thënë se zgjidhja e ngërçit politik për konstituimin e Kuvendit është në dorë të Vetëvendosjes si partia e parë e dal nga zgjedhjet parlamentare.

“Zgjidhja për ngërçin të cilin e ka krijuar vet zoti Kurti është po ashtu e vet zotit Kurti sepse radha kushtetute ligjore e praktike ekziston. Ai që duhet ta bëjë kryeparlamentarin duhet që t’i siguroj votat në Parlamentin e Kosovës. Nëse nuk i ulët me partitë politike me të cilat mendon se është më afër të dialogoj dhe t’i bën votat dhe e kalon këtë fazën e parë. Vetëvendosje po mundohet që ta interpretoj këtë si një fazë nuk është e vërtetë. Janë dy faza: faza e emërimit të kryeparlamentarit dhe faza e nënkryetarëve. Në të kaluarën për nënkryetar nuk ka pasur asnjëherë debat atë që kanë propozuar partitë politike ata janë votuar, por për kryetarët është një procedurë krejt tjetër të cilët këta po mundohen ta shtrembërojnë”, ka thënë deputeti i PDK-së.

Sa i përket deklarimeve të deputetëve të LV-së të cilët kanë thënë se vendi mund të shkoj në zgjedhje të jashtëzakonshme nëse nuk zgjidhet kandidatja e tyre për kryetare të Kuvendit Albulena Haxhiu, deputeti i PDK-së, Artan Behrami, tha se më së shumti PDK-së i konvenojnë zgjedhjet, por siç tha, vendit i duhet zgjidhje.

“Nëse ka një parti politike e cila do të kishte interes për zgjedhje në kuptimin elektoral është PDK-ja sepse matjet e fundit kanë treguar se ka rritje. Por, interesi i qytetarëve të Kosovës është krejt i ndryshëm ata presin nga ne deputetët dhe nga qeveria e ardhshme që unë besoj se do të jetë nga opozita, presin që t’i adresoj shqetësimet e tyre të përditshme dhe krejt çfarë po shohim sot është një tallje me qytetarët. Kur e sheh Albin Kurtin dhe deputetët e tjerë duke qeshur dhe nënqeshur në një proces, në një krizë të tillë kjo tregon shumë mirë se çka mendon ky njëri. Talljet e tjera që kanë ndodhur në Kuvend këto ditë janë të papranueshme”, ka thënë Behrami.