Deputeti i zgjedhur i Lëvizjes Vetëvendosje, Artan Abrashi, ka bërë me dije se janë në bisedime me deputetë të ndryshëm të Kuvendit dhe tashmë i kanë siguruar numrat për formimin e qeverisë së re.

Ai nuk ka treguar se me cilët deputetë janë duke biseduar, por ka thënë se gjendja është e mirë dhe se shumë shpejtë do t’i formojnë institucionet e reja.

“Për momentin krejt çka mund  të them është që gjithçka është në kuadër të asaj siç e kemi parashikuar dhe siç po presim rezultate. Jemi në bisedime me deputetë të ndryshëm dhe krejt çka mund të them tani është që gjendja është e mirë dhe urojmë dhe besojmë që shumë shpejtë do t’i formojmë institucionet, qeverinë e re. Besoj se po (kemi siguruar numrat) me deputetë të Kuvendit të Kosovës”, ka thënë Abrashi për “RTV21”.

I pyetur nëse Vetëvendosje, i ka dërguar ftesë ndonjë partie politike për ndonjë konsultim rreth koalicioneve, Abrashi nuk ka dhënë përgjigje konkrete, por ka thënë se janë hapur për bashkëpunim me të gjithë ata që ia duan të mirën vendit.

Ai ka theksuar se deklaratat e partive opozitare për të mos bashkëpunuar më lV-në nuk i marrin seriozisht.