Në Kosovë më 17 qershor janë regjistruar edhe dhjetë raste të reja me Covid-19. Sipas Institutit Kombëtar të Shëndetësisë Publike (IKShPK), shifra bazohet në testimin e 1 848 mostrave.

Gjatë 24 orëve të fundit janë shëruar edhe 12 pacientë, ndërsa raste aktive me Covid janë 184. Me këto shifra, sipas IKShK-së, numri i përgjithshëm i të infektuarve në Kosovë qëndron në 107 620, i viktimave në 2 250 dhe i të shëruarve në 105 186.

Të martën në Kosovë ka nisur fushata e vaksinimit masiv kundër Covid-19.

Kosova ka pranuar donacione vaksinash nga programi Covax i Organizatës Botërore të Shëndetësisë dhe nga Bashkimi Evropian.

Në muajin maj, autoritetet e Kosovës kanë njoftuar se kanë nënshkruar një kontratë me kompaninë farmaceutike amerikane “Pfizer” për blerjen e mbi 1 milion dozave të vaksinës “Pfizer/BioNTech”.

Këto vaksina nuk dihet se kur do të arrijnë.

Ministria e Shëndetësisë ka njoftuar se deri të enjten janë dhënë 118 538 vaksina. Të vaksinuar me dy doza janë 15 093 qytetarë.