Së paku 24 njerëz janë vrarë dhe mbi 30 të tjerë u plagosën nga një shpërthim në afërsi të një tubimi zgjedhor në Afganistan.

Në këtë ngjarje në Çarikar, kryeqytet i provincës Parvan, po merrte pjesë edhe presidenti afgan, Ashraf Ghani, por një ndihmës i tij ka thënë se Ghani nuk është plagosur.

Kreu i spitalit të provincës, Abdul Qasim Sangin, ka thënë se shumica e viktimave duket se janë civilë dhe se në mesin e tyre ka gra dhe fëmijë.

Një zyrtar i qeverisë lokale ka thënë se sulmi është kryer nga një sulmues vetëvrasës.

Përgjegjësinë për të nuk e ka marrë ende asnjë grup.

Në një tjetër incident, së paku tre persona janë vrarë nga një shpërthim në qendër të Kabulit, ka thënë policia, raporton “Rel”.

Militantët talibanë kanë kërcënuar se do t’i përshkallëzojnë sulmet për t’i shkurajuar njerëzit nga votimet në zgjedhjet presidenciale të 28 shtatorit.

Bisedimet midis Shteteve të Bashkuara dhe talibanëve, me qëllim arritjen e një marrëveshjeje për tërheqjen e mijëra trupave amerikane nga Afganistani, janë ndërprerë javën e kaluar.

Bisedimet nuk e kanë përfshirë Qeverinë e Afganistanit.