Dhoma e Tregtisë dhe Industrisë Kosovë (DhTIK) ka shprehur sërish shqetësimin për kamatat e larta të kredive nga bankat komerciale në vendin tonë.

Megjithëse sipas DhTIK-ut edhe në raportet e BQK-së kreditë e këqija vazhdojnë të jenë shumë të ulëta, ndërsa bankat mbeten dorë shtrënguese sa i përket dhënies së kredive me norma më të favorshme të interesit.

“Kjo qasje po u shkakton probleme të mëdha bizneseve tona, të cilat përkundër shumë sfidave, po përpiqen të zgjerojnë investimet e tyre. Numër i madh i bizneseve tona anëtare, kanë raportuar për norma të larta të interesit dhe administrata jo efikase”,  është thënë në reagimin e Dhomës së Tregtisë dhe Industrisë Kosovë (DhTIK).

Sipas DhTIK-ut, mungesa e likuiditetit është jetike për të mbështetur prodhimin dhe eksportet.

“Derisa në vendet e rajonit shtetet kanë ndërmarrë veprime të ndryshme, ku sipas të dhënave që i kemi mbledhur, normat e interesit në kredi janë shumë më të ulëta. Madje ka shtete, të cilat kanë marrë iniciativa për të inkurajuar bizneset edhe nga Kosova që të bartin prodhimin, duke ju ofruar kushte shumë më të favorshme, përfshirë edhe kamata shumë më të ulëta sesa ato që i ofron sektori bankar në Kosovë”, në reagimin e DhTIK-ut.

Me këtë rast, Dhoma e Tregtisë dhe Industrisë Kosovë (DhTIK) u ka bërë thirrje institucioneve kompetente shtetërore, BQK-së dhe sektorit bankar, që të ndërmarrin hapa të menjëhershëm në mbështetje të bizneseve, pasi nga kjo qasje po pëson ekonomia edhe ashtu e brishtë e vendit, e cila përballet me numër të madh të sfidave.

Ndryshe, bankat komerciale në Kosovë vazhdojnë me i rritur fitimet e tyre vit pas viti. Ky sektor financiar në vend, ka arritur të ketë profit të lartë gjatë vitit 2024.

Sipas raportit të fundit të Bankës Qendrore të Kosovës (BQK) për vitin 2024, nga kreditë bankare dhe shërbimet tjera ndaj qytetarëve dhe bizneseve, bankat komerciale kanë pasur fitim të pastër 182.1 milionë euro ose rreth 27 milionë euro më shumë se në vitin 2023. Në vitin 2023 profiti i bankave ishte 155 milionë euro.

Norma e interesit mesatare është mbi 6 për qind. Sipas BQK-së vlera e kredive për ekonomitë familjare, biznese dhe korporata tjera financiare arrin 5 miliardë e 813.4 milionë euro.