Dhoma e Tregtisë dhe Industrisë Kosovë ka kërkuar nga Qeveria e Kosovës që të bëhet ekzekutimi i menjëhershëm i pagesave për të gjitha bizneset të cilat tashmë kanë rekrutuar staf përmes platformës ‘Superpuna’.

“Pas ankesave të vazhdueshme të pranuara nga bizneset, Dhoma e Tregtisë shpreh shqetësimin e saj lidhur me vonesat e pagesave për punëtorët e rekrutuar përmes kësaj platforme, pagesa këto të cilat fillimisht duhet të kryhen nga bizneset në mënyrë vetjake për të gjithë të punësuarit e tek më pas të bëhet rimbursimi nga Qeveria e Kosovës”, është thënë në reagimin e Dhomës së Tregtisë.

Dhoma e Tregtisë dhe Industrisë Kosovë ka theksuar se aktualisht, subvencionimi nga qeveria bëhet me një muaj diferencë, ngase deklarimi i punëtorëve në ATK bëhet deri më 15 të muajit vijues të angazhimit.

“Pra, për punëtorët e angazhuar në muajin mars, deklarimi në ATK bëhet deri më 15 prill. Proces ky i cili po zvarritet, konkretisht tek në muajin Maj është bërë subvencionimi i kompanive për muajt shkurt dhe mars. Duke pasur parasysh kostot rreth përgatitjes së kërkesës, aprovimit, pagesës e tek me vonë kompensimit, ne mendojmë se ky proces do të duhej të thjeshtësohet duke bërë që autoritetet të paguajnë praktikantët direkt në vend se të përllogaritet pensioni e taksa bashkë me shumën e subvencionuar e cila për nga natyra nuk do të duhet të ishte e tatueshme”, është thënë në këtë reagim.

Dhoma e Tregtisë dhe Industrisë ka shtuar tutje se bizneset nuk duhet të detyrohen të hyjnë në borxhe në banka për të kryer paga dhe më vonë të presin kompensimin nga qeveria me data të paqarta.

“Për më tepër të gjitha kompanitë për të punësuar staf përmes platformës ‘Superpuna’, duhet të mos kenë obligime në Administratën Tatimore të Kosovës, sfidë që e kanë shumica e bizneseve në këtë situatë të jashtëzakonshme për të bërit biznes”, është thënë në reagimin e Dhoma e Tregtisë dhe Industrisë.