Pa Amad Diallo, Manchester United e di se nuk do të kishte dalë fitimtar nga “Etihad”. Lojtari më i mirë i ndeshjes është i kënaqur me fitoren e “Djajve” në fushën e rivalëve. “Ne donim ta fitonim këtë ndeshje, nuk ishte e lehtë”, ka thënë talenti i 20 herë kampionëve të Anglisë, i cili është një nga lojtarët më premtues të kësaj skuadre.

“Në pjesën e dytë ne ushtruam mirë presing, donim të fitonim dhe treguam se mund të fitojmë çdo ndeshje. Dua të falënderoj Zotin për këtë. Le ta shijojmë sot dhe të presim me padurim ndeshjen e radhës”, ka shtuar ai për mikrofonat e “Sky Sports”.

“Ky është një derbi. Nëse e luan këtë ndeshje, qëllimi është vetëm që ta fitosh atë dhe ne treguam se mund të fitojmë çdo ndeshje”, ka shtuar mesfushori. Falë kontributit të tij Unitedi fitoi një ndeshje jashtë në Premier Ligë pasi humbiste në pjesën e parë, për herë të parë që prej 9 majit 2021, kundër Aston Vilës (pas 17 ndeshjesh).