Në orët e pasdites të së enjtes në lokalet e Tregut të Gjelbër në Zonën Industriale Prishtinë-Fushë Kosovë, ra një zjarr i madh.

Flakët përfshinë 10 depo të perimeve ndërsa për t’i shuar ato u desh intervenim i zjarrfikësve prishtinas të asistuar edhe nga punonjësit e tregut, njofton Klan Kosova.

Motivet e zjarrit nuk dihen ende por për t’i zbardhur shkaqet, ekipet e policisë bashkë me ekspertin e zjarreve janë duke bërë hetime.

Rrezikshmëria ishte e lartë shkaku që në afërsi ishte edhe një depo me fishekzjarrë, ndërsa nga zjarri pësuan lëndime të lehta dy persona.

Dëmi sipas pronarëve besohet të jetë qindra mijëra euro.