Sot në orët e hershme të mëngjesit në rrugën “Shaqir Igrishta” në Prishtinë janë djegur tri vetura, një kamionetë dhe një rimorkio.

Rastin e ka konfirmuar zëdhënësja e policisë për rajonin e Prishtinës, Flora Ahmeti.

“Sot rreth orës 04:00, kemi pranuar informatën për një incident zjarri në rrugën “Shaqir Igrishta” në Prishtinë, ku janë djegur tri vetura, një kamionetë dhe një rimorkio. Në vendngjarje kanë dalë zjarrfikësit dhe policia të cilët janë marrë me rastin”, tha Ahmeti.

Nuk ka persona të lënduar nga ky incident, e zjarri është lokalizuar.

Hetuesit policorë, në koordinim me prokurorin, po kryejnë veprimet e nevojshme hetimore.