Brink i ishte bashkuar Departamentit Amerikan të Shtetit në vitin 1996, ndërsa si detyrë të parë jashtë vendit ajo ishte caktuar si zyrtare politike konsullore në Ambasadën e ShBA-së në Beograd nga viti 1997 deri në vitin 1999.

Por, në këtë detyrë, mision i saj ishte të raportonte mbi krimet e luftës që Serbia po i kryente në Kosovë.

Ajo thotë se ky ka qenë një prej momenteve që e ka menduar seriozisht tërheqjen nga Shërbimi i Jashtëm.

“Janë dy momente në jetën time kur gati e lashë Shërbimin e Jashtëm. Do t’ju tregoj për njërin. Për detyrën time të parë, Departamenti i Shtetit më dërgoi në Beograd në atë që atëherë quhej ish-Jugosllavi. Ishte fundi i viteve 1990. Nuk e kisha idenë se në çfarë po futesha. Ishte luftë. Dhe ishte e shëmtuar. Unë isha një zyrtare politike krejt e re që raportoja për Kosovën. Në një moment tronditës që nuk do ta harroj, shefi im hyri në zyrën time me një xhaketë dhe përkrenare që ishte shumë e madhe dhe tha: ‘Tani jeni përgjegjëse për Kosovën – dua që të shkoni të raportoni atë që ka ndodhur. Do të jetë e vështirë. Nëse keni nevojë për ndonjë gjë, më njoftoni’”, kujton Brink fjalët e shefit të saj.

Ajo më tej tregon për monitorimet që i bënte nëpër zonat e luftës në Kosovë, ndonëse thekson se nuk e ka pasur idenë se në çka po futej.

“Nuk e kisha idenë se çfarë po futesha, por isha gati të provoja aftësitë e mia. Dhe u testova. Në ato ditë qarkullonim në zonën e luftës me makina të paarmatosura, ose siç i quanim ‘lëkura të buta’. Mësova se nuk mund të dëgjoni zhurmën e artilerisë nëse jeni në një automjet të blinduar, duhet të jeni në një ‘lëkurë të butë’, me xhamat hapur”.

Ambasadorja Brink rrëfeu më tej edhe mizoritë që kishte parë të kishin kryer forcat serbe ndaj shqiptarëve të Kosovës – të cilat ajo i quan krime lufte.

“Në atë kohë serbët po kryenin krime lufte kundër kosovarëve dhe unë shpesh isha diplomati i parë ndërkombëtar, dhe i vetmi diplomat, në vend të ngjarjes – duke raportuar për mizoritë e tmerrshme – familje të vrara, të gjymtuara dhe të lëna në lëndinat e tyre të përparme. Shtëpi dhe jetë të shkatërruara me një ligësi dhe përpjekje që nuk e dija se mund të ishte e mundur”.

“Nëpër shtëpi, madje edhe rubinetat e lavamanit ishin prishur në mënyrë që uji do të vazhdonte të rridhte brenda, gjësende të shpërndara nëpër oborre, makina me xhama të thyer, goma të çara. I kisha studiuar konceptet e drejtësisë dhe të padrejtësisë, por kurrë nuk e dija dhe nuk e ndjeva se çfarë nënkuptonin në të vërtetë. Ishte një përgjegjësi e rëndë për të mbajtur për një oficer të ri dhe të papërvojë të Shërbimit të Jashtëm të sapodiplomuar dhe sapotrajnuar”, u shpreh ajo gjatë një fjalimi në Kolegjin Kenyon në Ohajo, ShBA, raporton Klankosova.tv.

Ajo thotë se Shërbimit i ishte bashkuar për të bërë një ndryshim, “jo për të dëshmuar tmerrin”, ndërsa shton se në bisedën me shefin e saj të asaj kohe, diplomatin e quajtur Bob Norman, i kishte thënë: “Unë nuk u bashkova për këtë punë”.

“Ai vendosi butësisht krahun e tij mbi shpatullën time dhe më tha thjesht: ‘Po, për këtë je bashkuar, thjesht nuk e dije’”.

Ambasadorja Bridget Brink ka nisur detyrën e saj si kryediplomate amerikane në Ukrainë në vitin 2022.