Gjimnazi “Frang Bardhi” në Mitrovicë për të dytën herë me radhë organizon ceremoninë madhështore të diplomimit për 419 maturantë të cilët kanë përfunduar me sukses vitin akademik 2021/22.

Kjo ceremoni është mbajtur në Palestrën e sportit “Minatori”, ku i pranishëm ishte edhe kryetari i komunës, Bedri Hamza, nënkryetari i komunës, Arian Tahiri, kryesuesja e Kuvendit Komunal, Vesa Broja, si dhe drejtoresha e Arsimit, Drita Kadriu.

Për të kremtuar këtë ditë të veçantë, maturantët vulosën me gëzim e mallëngjim kohën e kaluar në gjimnaz plot kujtime të bukura e të çmueshme, përgjatë këtyre tri viteve të shkollimit.

Në fjalën e tij, kryetari i komunës, Bedri Hamza, ka uruar të gjithë nxënësit për përfundimin e shkollimit të mesëm të lartë, duke iu dëshiruar atyre suksese të vazhdueshme në rrugën e dijes.

Më tutje kryetari Hamza ka falënderuar të gjithë mësimdhënësit, për punën dhe kontributin e tyre të pakontestueshëm në edukimin e gjeneratave, në mënyrë që nxënësve mitrovicas t’u sigurohet arsimim sa më cilësor.