Pasi ka kaluar disa vite në krye të ekipeve të të rinjve të Argjentinës, Javier Mascherano ka vendosur të pranojë ofertën e Inter Miamit, që disa ditë më parë i besoi drejtimin e ekipit të parë.

Ish-mesfushori ka ndarë mendimet e tij dhe ka shpjeguar arsyet që e çuan të mbyllë ciklin me “Albicelesten” dhe të transferohet në Shtetet e Bashkuara: “Jam shumë i lumtur që jam këtu, për mua është një sfidë e madhe. Jam shumë i emocionuar dhe mezi pres të nis punën në vitin 2025”.

Mascherano do të ribashkohet me ish-shokët e tij të skuadrës (Messi, Suarez, Busquets dhe Jordi Alba), të cilët do ta ndihmojnë të ambientohet: “Është një projekt ambicioz, me lojtarë të njohur, shumë prej tyre kanë qenë shokët e mi të ekipit. Por ka edhe shumë talente të reja nga Akademia, të cilat i konsideroj thelbësorë për të ndërtuar diçka të rëndësishme”. Mascherano do të zëvendësojë Gerardo Tata Martinon, i cili u largua nga klubi për “arsye personale”, dhe ka firmosur një kontratë deri në fund të vitit 2027.

David Beckham, pronar i Inter Miamit, për emërimin e Mascheranos ka deklaruar: “Jemi shumë të emocionuar që e mirëpresim si trajnerin tonë. Ka qenë një nga lojtarët më të mirë në botë dhe është një trajner me përvojë”.