Udhëheqësi i Republikës Serbe në Bosnje, Milorad Dodik, ka deklaruar se Asociacioni i komunave me shumicë serbe duhet të ketë kompetenca ekzekutive dhe në një pjesë të ngjajë me Republikën Serbe me të cilën ai udhëheq.

Ai për “Kosovo Online”, ka thënë se propozimi franko-gjerman nuk ndryshon shumë nga disa në të kaluarën, duke qenë se bazohet në kërkesën që Serbia, të paktën në heshtje, të njohë Kosovën, gjë që, siç ka theksuar ai, “nuk duhet të ndodhë kurrë”.

Dodiku ka shtuar se duhet t’i besohet presidentit Aleksandër Vuçiq kur thotë se “Serbia refuzon mundësinë e njohjes së Kosovës në çfarëdo mënyre dhe dhënies së pëlqimit që Kosova të anëtarësohet në Kombet e Bashkuara”.

“Bashkësisë ndërkombëtare nuk duhet t’i besohet, por duhet diskutuar dhe çdo propozim që nuk respekton qëndrimin kombëtar dhe shtetëror serb duhet të refuzohet”, ka thënë Dodiku.