Joe Tacopina, avokati i ish-presidentit amerikan, Donald Trump, ka thënë se klientit të tij nuk do t’i vihen prangat kur të marrë pjesë në gjykatën e New Yorkut javën e ardhshme.

I pyetur se si pret që të zgjidhet ky proces gjyqësor, Tacopina tha se prokurorët do të përpiqen ta marrin çdo lloj të publicitetit nga kjo situatë.

“Ne do të hyjmë atje, do të deklarohemi të pafajshëm dhe do të flasim për paraqitjen e mocioneve, të cilën do ta bëjmë menjëherë në lidhje me qëndrueshmërinë ligjore të këtij rasti”, tha Tacopina, shkruan BBC.

Kujtojmë se Trump akuzohet në lidhje me një pagesë që supozohet t’i ketë bërë një ylli të pornografisë në vitin 2006.

Siç shkruan BBC, avokati i Trump, Michael Cohen, i pagoi asaj 130 mijë dollarë në mënyrë që të heshtet ngjarja, e cila quhet pagesë në heshtje dhe në ShBA është e ligjshme.

Por, ajo që e ka futur Trumpin në telashe është se pagesa është regjistruar si pagesë për tarifa ligjore.

Ndërsa, sa i përket situatës me fushatën, në kushtetutën amerikane nuk ka asgjë që ta pengojë Trumpin që të kandidojë për president.