Presidenti i SHBA, Donald Trump ka deklaruar të shtunën se do të impononte sanksione të reja ndaj Iranit, një lëvizje e dukshme për të zbutur tensionet pas rrëzimit të një droni amerikan të pa pilotuar këtë javë nga Republika Islamike.

Të enjten, një raketë iraniane shkatërroi një avion spiun të Global Hawk të SHBA, një incident që Uashingtoni tha se ndodhi në hapësirën ajrore ndërkombëtare. Trump më vonë tha se kishte thirrur ushtrinë për tu hakmarrë, por u tërhoq sepse nga ky sulm mund të ishin vrarë 150 vetë.

Teherani përsëriti të shtunën se droni spiun u rrëzua mbi territorin e saj dhe tha se do të reagonte fort ndaj çdo kërcënimi ndaj SHBA-së.

Duke folur në Uashington të shtunën, Trump tregoi se qeveria po ndërmerrte një rrugë diplomatike për të ushtruar presion mbi Teheranin, duke imponuar sanksione të reja.

Aksioni ushtarak është “gjithmonë në tavolinë”, tha Presidenti, por ai shtoi se ishte i hapur për të arritur shpejt një marrëveshje me Iranin, që ai tha se do të mbështeste ekonominë e vendit.

“Ne do ta quajmë atë, ‘Le ta bëjmë Iranin përsëri të madh’”, ka deklaruar Trump.

Ai më vonë shkroi në “Twitter” nga Camp David: “Ne po vendosim sanksione të mëdha shtesë ndaj Iranit të hënën. Pres që Irani të bëhet sërish një vend produktiv dhe i begatë”.

Uashingtoni dhe Teherani kanë thënë se nuk janë duke kërkuar një luftë, por Irani ka paralajmëruar për një përgjigje “dërrmuese” nëse sulmohet nga SHBA.