Në Kosovë, analistët po paralajmërojnë gjithnjë e më shumë skenarin e zgjedhjeve të reja të parakohshme dhe për këtë, shkak është Asociacioni i komunave me shumicë serbe.

Sipas analistëve, themelimi ose refuzimi i Asociacionit është barrë e rëndë për kryeministrin Albin Kurti, ndaj në fillim të vitit 2024 mund të priten zgjedhje të parakohshme në vend.

Artan Muhaxhiri është shprehur se: “Asociacioni është shndërruar në një element të patejkalueshëm dhe çdo humbje kohe në realizimin e tij shkon në dëm të qeverisë dhe shtetit të Kosovës, sepse nënkupton izolimin. Kurti është në pozitë të palakmueshme, pasi si opozitar ka qenë kundërshtari më i madh i Asociacionit, ndërsa si kryeministër e ka kuptuar se nuk e bllokon dot procesin”.

Ndërsa Dritëro Arifi, ka theksuar se “qeveria e ka deligjitimuar veten me pranimin e Asociacionit”.

“Nuk është gjë e keqe, por tani duhet ta kërkojë votën për legjitimim”, ka thënë ai.

Edhe skenari tjetër, ai i mospranimit të Asociacionit, apo edhe mosthemelimi i tij, do të sillte vetëm izolimin e Kosovës.

Së fundmi, Albin Kurti ka ofruar edhe mundësinë që vitin e ardhshëm ta shkruajë vetë një draft modern evropian. Në përgjigje të të dërguarit të posaçëm të BE-së për dialogun Kosovë-Serbi, Miroslav Lajçak, i cili ka thënë se draft-statuti i Asociacionit është çështje e brendshme e Kosovës. Kësisoj, edhe Kurti tha se mund ta shkruajë ai draft-statutin, në bashkëpunim me ministrat Nenad Rashiqn dhe Elbert Krasniqin.