Milovan Drecun, kryetari i të ashtuquajturit “Komision për Kosovën” në Serbi, ka thënë se nëse “Kosova e zbaton marrëveshjen për energjinë atëherë nga kjo do të përfitojnë serbët”.

Sipas tij, “në radhë të parë përfiton populli serb”, transmeton agjencia e lajmeve serbe “Tanjug”.

Në bazë të marrëveshjes të nënshkruar më 21 qershor në Bruksel, Zyra e Rregullatorit e Energjisë (ZRrE) do të licencojë një kompani me emrin “Elektroserver” për t’i mbledhur faturat e energjisë elektrike të serbëve të Veriut.