Drejtori i Agjencisë Qendrore të Inteligjencës amerikane (CIA), William Burns, ka mbërritur në Sarajevë të martën për një vizitë, kanë konfirmuar për “Radion Evropa e Lirë” nga qarqet e afërta me Ambasadën e Shteteve të Bashkuara në Bosnje e Hercegovinë (BeH).

Burns pritet të mbajë disa takime në Sarajevë, ndër të tjera, me drejtorin e Agjencisë së Inteligjencës dhe Sigurisë së Bosnje e Hercegovinës, Almir Xhuvo, si dhe me anëtarët e Presidencës së BeH dhe ministrin e Jashtëm të BeH.

Presidenca dhe Ministria e Jashtme nuk kanë mundur të ndajnë më shumë të dhënat rreth vizitës së Burns.

Një ish-diplomat dhe ish-ambasador në Rusi, Burns është një figurë qendrore në administratën e presidentit amerikan, Joe Biden, pasi ai është gjithashtu anëtar i kabinetit presidencial të Shtëpisë së Bardhë.

Presidenti Biden  e kishte emëruar atë në pozicionin e drejtorit të CIA-s në janar 2021.

Burns ishte betuar si drejtor i CIA-s në mars 2021, duke u bërë diplomati i parë në karrierë që shërbeu si drejtor. Presidenti Biden e ka promovuar atë në kabinet në qershor 2023.

Ai ka shërbyer gjashtë presidentë dhe administrata (të të dyja palëve) gjatë gati katër dekadave të shërbimit publik në diplomaci dhe inteligjencë. Ai është vetëm diplomati i dytë në histori që u bë zëvendëssekretar i Shtetit. Ai ishte gjithashtu ambasador i ShBA-së në Rusi dhe në Jordani.

Pasi është tërhequr nga shërbimi diplomatik në fund të vitit 2014, Burns ka shërbyer si president i Carnegie Endowment for International Peace.

Ai ka diplomuar për histori nga Universitetin LaSalle, dhe ka master dhe doktoraturë për marrëdhënie ndërkombëtare nga Universiteti i Oksfordit.

Ish-drejtori i CIA-s, John Brennan, ishte i fundit nga kjo agjenci që e ka vizituar Sarajevën, pas vizitës së tij më 2016.