Drejtori i organizatës ndërkombëtare “Transparency International”, Daniel Eriksson, në një intervistë për Ekonomia Online ka thënë se vullneti politik është çelësi për reformat e luftimit të korrupsionit dhe se këto reforma duhet të jenë gjithëpërfshirëse dhe shumë më të shpejta.

Ai ka thënë se strategjia kundër korrupsionit është shumë e vonuar dhe se ligji për lobimin është shumë i nevojshëm.
Eriksson ka thënë se shumica parlamentare duhet të veprojë për të siguruar funksionimin e sistemit, në atë mënyrë që kur ato sisteme të vendosen, jo vetëm qeveria aktuale, por të gjitha qeveritë e ardhshme të jenë më elastike ndaj korrupsionit.

“Vullneti politik për reforma kundër korrupsionit është thelbësor për të arritur progres. Dhe kjo duhet të rezultojë në reforma që janë gjithëpërfshirëse dhe më të shpejta se sa shihni për momentin. Duhet të kujtojmë se strategjia kundër korrupsionit është shumë e vonuar dhe se ligji për lobimin është pak a shumë i ngecur. Qeveria nuk duhet të përdorë shumicën e saj aktuale në kurriz të dialogut publik. Nëse doni të luftoni korrupsionin, duhet të futni sisteme që janë elastike ndaj korrupsionit. Është shumë e rëndësishme të mbahet mend për njerëzit, për qytetarët e Kosovës, se nëse keni një sistem që nuk funksionon dhe zëvendësoni njerëzit, do të merrni të njëjtin rezultat. Shumica në Parlament, në konsensus me Parlamentin, duhet të veprojë për të siguruar funksionimin e sistemit. Që sistemet të vendosen në mënyrë që jo vetëm qeveria aktuale, por të gjitha qeveritë e ardhshme, të jenë më elastike ndaj korrupsionit dhe kjo është një mundësi e madhe që ekziston tani në Kosovë”, ka thënë ai.

Drejtori i TI-së ka theksuar që shoqëria civile dhe mediat kanë rol thelbësore në luftë kundër korrupsionit.

“Është gjithashtu shumë e rëndësishme të mbahet mend se shoqëria civile dhe media kanë një rol kritik në sigurimin e funksionimit të demokracisë dhe që lufta kundër korrupsionit të jetë efektive”, ka thënë ai.
Eriksson është shprehur se korrupsioni ka pasoj të mëdha për shtetin e qytetarët e saj, prandaj sipas tij, duhet që të punohet së bashku me të gjithë akteret kundër kësaj dukurie.

“Ne gjithashtu duhet të kuptojmë se korrupsioni ka pasoja, korrupsioni vret. E pamë këtë në pandemi, por ne vazhdojmë të shohim në të gjithë botën, në baza të përditshme ku ndodh aksidenti për shkak të rrugëve të këqija ose na fiket energjia për shkak të mirëmbajtjes së keqe në shtet. të krizave. Korrupsioni nuk është një krim pa viktima. Korrupsioni nuk është vetëm futja e joefikasitetit në financat e shtetit. Njerëz, qytetarë, vuajmë kur ekziston korrupsioni dhe prandaj duhet të punojmë kundër tij”, ka thënë ai.