Presidenti i Federatës së Futbollit të Kosovës, Agim Ademi, së bashku me ushtruesin e detyrës së sekretarit të përgjithshëm, njëherësh drejtorin teknik, Marcus Weidner, kanë pritur sot në takim dy të deleguarit e FIFA-s për zhvillimin e futbollit, Juerg Nepfer dhe Tomas Danilevicius, ky i fundit konsulent për zhvillimin rajonal të futbollit.

Gjatë këtij takimi, presidenti Ademi ka njoftuar zyrtarët e FIFA-s për zhvillimet e përgjithshme në futbollin kosovar dhe për projektet e vazhdueshme të FFK-së, duke shprehur mirënjohjen e tij për mbështetjen e pandalshme të FIFA-s ndaj këtyre projekteve.

Nga ana tjetër, të deleguarit nga FIFA, Nepfer dhe Danilevicius, kanë theksuar përkrahjen e vazhdueshme të FIFA-s për Federatën e Futbollit të Kosovës dhe kanë nënvizuar rëndësinë e angazhimit më të madh të shtetit për të mbështetur FFK-në në zhvillimin e futbollit, veçanërisht në aspektin e përmirësimit të infrastrukturës sportive.