Përfaqësuesit e Kongresit Panshqiptar Amerikan (KPA) ka zhvilluar një takim me 5 zyrtarë nga Departamenti Amerikan i Shtetit (DASh) pas një kërkese që organizata i ka bërë sekretarit Antony Blinken për ndihmë në sigurimin e vaksinave kundër Covid-19 për Kosovën.

“Përveç diskutimit mbi bashkëpunimin e mundshëm për të ndihmuar Kosovën në prokurimin e vaksinave, pjesëmarrësit diskutuan edhe çështje të ndryshme me të cilat po përballet Kosova dhe rajoni, përfshirë dialogun, Gjykatën Speciale, vëllezërit Bytyqi, zgjedhjet e ardhshme dhe reformën në Drejtësi në Shqipëri, regjistrimin e popullsisë në Maqedoninë Veriore, pasivizimin në Preshevë dhe rritjen e paqëndrueshmërisë në Malin e Zi”, ka njoftuar Kongresi Panshqiptar Amerikan.

Si përfaqësues të Departamentit Amerikan të Shtetit të pranishëm në takim ishin: David Kostelancik, drejtor për Zyrën e Evropës Juglindore, Zyra e Çështjeve Evropiane, Michael Konstantino, zëvendësdrejtor, Ilan A. Goodman, zyrtar i lartë për Zyrën e Kosovës, Wendy Rejan, zyrtar për Zyrën e Kosovës dhe Malikat Rufai, zyrtar për Zyrën e Maqedonisë Veriore dhe zyrtar mbështetës për Zyrën e Shqipërisë.

Kostelancik ka falënderuar Kongresin Panshqiptar Amerikan për angazhimin dhe  ka ofruar bashkëpunim në çështje të ndryshme me të cilat po përballet Ballkani.