Dje, përmes një akademie perkujtimore dhe filmit dokumentar kushtuar rektorit Ejup Statovci, dhe sot përmes homazheve dhe marshimit të studentëve të Universitetit të Prishtinës, nën organizimin e Parlamentit Studentor, u shënua 25 vjetori i demonstratave studentore të 1 tetorit 1997.

“Kjo ngjarje e shënuar e historisë sonë më të re, i bëri bashkë studentët, profesorët, dhe qytetarët e Kosovës që pa u lëkundur, shënuan kthesën e madhe të rrjedhës së ngjarjeve politike të Kosovës, deri te çlirimi i saj e për të cilën shumë studentë e profesorë dhanë edhe jetën”, ka thënë Bujar Dugolli, ish-lider i Lëvizjes Studentore të ‘97-s.

Ai ka thënë se pas gjithë këtyre viteve, sot, brezi i ri i studentëve të prirë nga Parlamenti Studentor, marshuan rrugës së njëjtë, për të kujtuar me respekt secilin student, kujtuan profesorët e prirë nga rektori historik Ejup Statovci, por edhe qytetarët që atë ditë kishin mbushur rrugët që shpinin drejtë universitetit tonë.

“Okupatori serb na e kishte ndaluar universitetin me qëllim prerjen e rrugës së dijes së të rinjve tanë.
Askush nuk mund t’ia prej rrugën e studentëve, ata janë, siç edhe ishin shpresa dhe e ardhmja e Kosovës. I përjetshëm qoftë kujtimi për të rënët për liri”, ka thënë Dugolli.