Shkruan: Bujar Dugolli

Zgjedhjet janë një moment kyç për çdo shoqëri demokratike, ku përmes votës përcaktohet drejtimi politik i një vendi. Megjithatë, mënyra se si zhvillohet një fushatë zgjedhore shpesh ndikon drejtpërdrejt në klimën institucionale pas zgjedhjeve.

Gjatë fushatës së fundit, u vu re një gjuhë e ashpër dhe shpesh fyese mes liderëve dhe kandidatëve të partive politike. Kjo retorikë ka krijuar ndarje të thella në shoqëri dhe ka ndikuar negativisht në funksionimin institucional.

Pasojat janë të dukshme: institucionet janë zhytur në një ngërç, ndërsa partitë politike ngurrojnë të bashkëpunojnë për ndërtimin e tyre. Ky boshllëk institucional ka hapur rrugë për kushtëzime dhe keqpërdorime, ku disa përfaqësues të pakicave vendosin interesin personal mbi atë shtetëror.

Tani lind pyetja: Si mund të zgjidhet ky ngërç?

Për të dalë nga kjo situatë, liderët politikë duhet të tregojnë pjekuri dhe përgjegjësi. Duhet guxim për falje dhe vullnet për bashkëpunim. Retorika e përçarjes duhet të zëvendësohet me dialog konstruktiv.

Vetëm përmes bashkëpunimit, faljes dhe vendosjes së interesit të përgjithshëm mbi atë personal, Kosova mund të ecë përpara si një shtet demokratik dhe funksional.

E ardhmja e Kosovës nuk ndërtohet mbi inate dhe ndasi, por mbi mirëkuptim, respekt dhe përkushtim ndaj së mirës së përbashkët.

Gandi thoshte: “Njerëzit e dobët nuk mund të falin kurrë. Falja është cilësi e njerëzve të fuqishëm.”