Zëvendësministri i Punës dhe Mirëqenies Sociale (MPMS), Çerkin Dukolli, ka marrë pjesë të premten në shënimin e Ditës Ndërkombëtare për Siguri dhe Shëndetin në Punë, organizuar nga kompania “Sharr Cem”. 

Në fjalën e tij zëvendësministri Dukolli ka thënë se kujdesi institucional për siguri dhe shëndet në punë, përveç që është obligim ligjor, mbi të gjitha është çështje humane, ngase kemi të bëjmë me ruajtjen e shëndetit dhe jetës së njeriut.

“Ofrimi i ambientit të sigurt dhe të shëndetshëm në vendet tona të punës, nënkupton, ruajtjen e jetës dhe shëndetit të vetë punëtorëve,  punëdhënësve por edhe të  gjithë atyre që për ndonjë arsye apo  tjetër kanë qasje në ambientet e punës”, është shprehur ai.

Dukolli ka theksuar se Ministria e Punës dhe Mirëqenies Sociale  ka ndërmarrë veprime të konsiderueshme në këtë drejtim.

“Rrjedhimisht kemi  harmonizuar legjislacionin nga kjo fushë me atë të BE-së,  kemi ndërtuar  trupat ekzekutive inspektuese dhe përtej saj  çdo vit po ndërmarrim  fushata vetëdijësuese, me qëllim që të informojmë palët për detyrimet që kanë në raport me aktet juridike të sigurisë dhe shëndetit në punë”, ka deklaruar Dukolli.

Lidhur me masat konkrete në ruajtjen e shëndetit në punë, zëvendësministri Dukolli i ka njoftuar të pranishmit se Qeveria e Kosovës ka themeluar Këshillin Nacional për Siguri dhe Shëndet në Punë, i cili në kompetenca të veta ka jo vetëm konstatimin e gjendjes, por edhe hartimin e politikave për përmirësimin e nivelit të sigurisë dhe shëndetit në punë, si dhe përcjelljen në vazhdimësi të gjendjes së sigurisë dhe shëndetit në punë të të punësuarve.

Zëvendësministri Dukolli, i cili njëherësh është edhe kryetar i Këshillit Nacional për Siguri dhe Shëndet në Punë, u ka bërë thirrje të gjithë punëdhënësve që të krijojnë ambiente të sigurta  pune, punëtoret të kujdesen për sigurinë e tyre dhe të tjerëve, e gjithsesi të përdorin pajisjet e duhura për siguri dhe mbrojtje në punët e tyre specifike.

Po ashtu ai ka inkurajuar  Inspektoratin e Punës që të vazhdojë  me  punën në bazë të dispozitave ligjore, që përmes inspektimeve në terren të mundësojnë zbatimin e plotë të legjislacionit në fuqi që rregullon të drejtat dhe detyrimet mbi  marrëdhënien e punës, por edhe sigurinë dhe shëndetin në punë.

/Epoka e re/